გადმოგირეკავთ
რა არის პლასტიკური ქირურგია?
პლასტიკური ქირურგიის დიდ ნაწილს ესთეტიკური ქირურგია შეადგენს, მაგრამ რეკონსტრუქციული ქირურგია, მტევნის ქირურგია, კრანიოფიალური ქირურგია, მიკროქირურგია და დამწვრობის მკურნალობა ასევე შედის პლასტიკური ქირურგიის დარგში.
რეკონსტრუქციული ქირურგია უზრუნველყოფს კანის, კანქვეშა ქსოვილის და ძვლების თანდაყოლილი ან შეძენილი დაზიანებების, ანომალიების და ქსოვილის დანაკარგების აღდგენას. მაგალითად, შეზრდილი თითები (სინდაქტილია), ტრავმული დამწვრობა, სხვადასხვა ჭრილობები და კიდურების მოწყვეტა, ქრონიკული წყლულები, ჰემანგიომას მსგავსი სისხლძარღვთა სიმსივნეები შედის ქირურგიის ამ მიმართულებაში.
ესთეტიკურ/კოსმეტიკური ქირურგია კი მოიცავს ოპერაციებს და პროცედურებს, რომლებიც ტარდება სხეულის გარეგნობის შემდგომი გაუმჯობესებისა და სრულყოფის მიზნით. აქ სამედიცინო პრობლემაზე მეტად მთავარი საზრუნავი სილამაზე და ესთეტიკაა.
პლასტიკური ქირურგია არის ფართო დარგი. ამ დარგში მომუშავე სპეციალისტები პლასტიკური ქირურგიის სპეციალობასთან ერთად ასევე ითვისებენ ესთეტიკური (კოსმეტიკური) ქირურგიის სპეციალობას. ესთეტიკურმა პრობლემებმა ზოგჯერ შეიძლება გამოიწვიოს დაავადებები, რომლებსაც თან ახლავს სამედიცინო პრობლემები. მაგალითად, როგორც სამედიცინო, ასევე ესთეტიკური პრობლემები, როგორიცაა გიგანტური სარძევე ჯირკვლები (გიგანტომასტია) ან ჭარბწონიანობა შეიძლება ქირურგიული ჩარევით ერთად გადაწყდეს. გარდა ორგანოს ესთეტიკური კორექციისა, ძალიან მნიშვნელოვანია მისი ფუნქციის შენარჩუნებაც. მაგალითად, რინოპლასტიკის დროს სუნთქვის პრობლემებიც უნდა გამოსწორდეს .
გარდა იმისა, რომ პლასტიკური ქირურგია მკურნალობს პათოლოგიურ დარღვევებს, როგორიცაა ქსოვილის დაზიანებები, ქირურგიული ოპერაციების შემდგომი ნაწიბურები, ტრავმით გამოწვეული პროლაფსები, მას ასევე შეუძლია განახორციელოს ესთეტიკური ჩარევები პაციენტის მოთხოვნის შესაბამისად.
რა დაავადებებს მკურნალობს პლასტიკური და რეკონსტრუქციული ქირურგია?
- თანდაყოლილი ან შეძენილი დეფექტები (ტუჩის ნაპრალი, სასის ნაპრალი, თანდაყოლილი შეზრდილი თითები)
- ტრავმისა და დაავადებების შემდეგ წარმოქმნილი ღია ჭრილობები
- სახის ძვლების ტრავმული მოტეხილობები და მათი ქირურგიული მკურნალობა
- კანის კიბო და ქირურგიული მკურნალობა
- მტევნის პოსტტრავმული ფუნქციური დარღვევები და მტევნის ქირურგია
- მიკროქირურგია (ქსოვილის გადანერგვა, ნერვებისა და სისხლძარღვების აღდგენა)
- კანის სიმსივნეების ქირურგიული მკურნალობა (ხალები, მელანომები)
- ქუთუთოების დეფექტები
- დამწვრობა და ნაწიბურები, რომლებიც იწვევენ ფუნქციურ დარღვევებს და დეფორმაციას.
პლასტიკური ქირურგიის განყოფილებაში ხშირად ჩატარებული ქირურგიული ოპერაციები შემდეგია:
ნაწიბურების მკურნალობა:
ზოგადად, ყველა ჯანმრთელ ადამიანში ჭრილობის შეხორცების შემდეგ წარმოიქმნება ნაწიბური. ქირურგიული ჩარევაც ასევე ქსოვილის დაზიანებას იწვევს და ნაწიბურების წარმოქმნა ნორმალურია. ანალოგიურად, დამწვრობაც ნაწიბურების წარმოქმნის ერთ-ერთი მნიშვნელოვანი მიზეზია. ამიტომ იმ პაციენტებში, რომლებსაც ნაწიბურები აწუხებთ, პლასტიკური ქირურგების მიერ თანამედროვე ტექნოლოგიების გამოყენებით ხდება მათი კორექცია.
შეუხორცებელი ჭრილობების მკურნალობა:
ჭრილობების შეუხორცებლობა შეიძლება გამოიწვიოს სისხლძარღვთა ოკლუზიამ, საწოლზე მიჯაჭვულმა მდგომარეობამ ან შაქრიანმა დიაბეტმა. პლასტიკური ქირურგიის ერთ-ერთი ყველაზე მნიშვნელოვანი პროცედურაა ასეთი ჭრილობების მკურნალობა, რაც გულისხმობს ჭრილობის წარმოქმნის პრევენციას, თანამედროვე ტექნიკით ჭრილობების მკურნალობას, შემდგომ დაკვირვებას და საჭიროების შემთხვევაში ოპერაციას.
კანის კიბო:
დღესდღეობით კანის კიბოს შემთხვევები საგრძნობლად გაიზარდა ისეთი მიზეზების გამო, როგორიცაა მზის გადაჭარბებული ზემოქმედება და ოზონის შრის შემცირება. არსებობს მრავალი სახის კანის კიბო. მიუხედავად იმისა, რომ ზოგიერთი სახეობის სამკურნალოდ 3-4 მმ კანის ფართობის მოცილება საკმარისია, ზოგიერთი სახეობა საკმაოდ აგრესიული და საშიშია და უფრო დიდ ქირურგიულ ჩარევას საჭიროებს. მთავარი, რასაც ამ კუთხით ადამიანმა ყურადღება უნდა მიაქციოს, არის სხეულის დათვალიერება და ხალებზე თვალყურის დევნება. თუ ხალი სწრაფად იზრდება, იცვლის ფერს და ფორმას და იწვევს ქავილს დაუყოვნებლივ უნდა მიმართოთ პლასტიკური ქირურგიის განყოფილებას. ხალი შეიძლება მოიკვეთოს მცირე ლოკალური ოპერაციით და ჩატარდეს პათოლოგიური გამოკვლევა. ამ გზით შესაძლებელია უფრო ზუსტი მკურნალობის დაგეგმვა.
სახის ძვლების მოტეხილობები:
ცხვირის, ლოყის ან ყბის ძვლის მოტეხილობა შეიძლება განვითარდეს სახის მიდამოში სხვადასხვა ტრავმის ან უბედური შემთხვევის შედეგად. ამ მოტეხილობების ქირურგიული მკურნალობისას გამოიყენება ტიტანის ფირფიტები და ხრახნები. სახის ძვლების აღდგენა მნიშვნელოვანია არა მხოლოდ ესთეტიკური, არამედ ფუნქციური თვალსაზრისითაც.
თავისა და კისრის არეში აღდგენითი ოპერაციები:
კიბოს, დამწვრობის ან უბედური შემთხვევის შედეგად ცხვირი, ყური, ტუჩები და მსგავსი ორგანოები მთლიანად ან ნაწილობლივ შეიძლება დაზიანდეს. ასეთ შემთვევებში რიგი ქირურგიული ტექნიკებით შესაძლებელია ორიგინალთან მიახლოვებული შედეგების მიღება.
გენიტალური ორგანოების ანომალიები:
გენიტალური ორგანოების ზოგიერთი თანდაყოლილი ანომალიის კორექცია შესაძლებელია პლასტიკური ქირურგიის საშუალებით. განსაკუთრებით გავრცელებულია "ჰიპოსპადია" ხალხში ცნობილი როგორც "წინასწარმეტყველის წინადაცვეთა". ეს არის მდგომარეობა, როდესაც შარსადენის ხვრელი პენისის წვერის ნაცვლად სხვა ნაწილში მდებარეობს. მდედრობითი სქესის ჩვილებში საშო შეიძლება არ ჩამოყალიბდეს სხვადასხვა მიზეზის გამო. ამ და მსგავს შემთხვევებში პლასტიკური ქირურგია გვთავაზობს მკურნალობის ყველაზე შესაბამის მეთოდს.
მიკროქირურგიული პროცედურები:
სხეულის ერთი უბნიდან სხვა საჭირო ადგილას ქსოვილის გადატანას სისხლძარღვებთან და ნერვებთან ერთად, ახორციელებს მიკროქირურგია. მაგალითად, მთლიანად დაზიანებული ყბის აღსადგენად შეიძლება გამოიყენონ წვივის ძვალი. ან საყლაპავი მილი შეიძლება ჩაანაცვლონ ნაწლავით. ამ ტექნიკით შესაძლებელია დაზიანებული ნერვებისა და სისხლძარღვების აღდგენაც.
სარძევე ჯირკვლის რეკონსტრუქცია:
დღეს ბევრ ქალს, რომელიც მკურნალობს ძუძუს კიბოს, მკერდის ნაწილი ან მთლიანად მკერდი მოკვეთილი აქვს. ონკოლოგთან კონსულტაციის შემდეგ პლასტიკური ქირურგის დახმარებით შესაძლებელია ძუძუს რეკონსტრუქცია. სარძევე ჯირკვლის აღდგენის ოპერაცია შეიძლება ჩატარდეს როგორც ონკოლოგიურ ოპერაციასთან ერთდროულად, ასევე მკურნალობის დასრულების შემდეგ. ოპერაციის დროს გამოიყენება პაციენტის საკუთარი ქსოვილი ან მკერდის პროთეზი.
